" Naam ! "

Larazti palakon pe ek khwaab
fir nam hua hai aaj

Seher hogii to sochenge
Chaand ko kyaa naam dun

Aleph kahun ya Sifar kahun ?

" Baatein .. "

Kal kuch
awara baaton ki
toli nikali thi,
Lafz kuch jyada hi
paine the shayad...

dar-o-deewar pe
kharochen si hain
abhi bhi..

".. ret ke teele "

ret ke teele ..
haathon ki lakeerein ..

hawa ke jhonke
surat hi badal dete hain !!!

".. ehsaas .. "

Dhadkan ke aage bhi ek ehsaas hai ..
tu Dur hoke bhi kitna paas hai ..

lakeeron me sambhal ke rakhta hun,
anjaane rishton me bhi koi aawaj hai .. ..

Dil se kaise jude huye hain kai Dil,
sochta hun, puchhta hun, shayad koi jawaab hai ..

Dhadkan ke aage bhi ek ehsaas hai
tu Dur hoke bhi kitna paas hai
..


"regujar me raasta dikhta hai,
raahon me saathii koi .. "

" .. sifar ! "

socha tha Chand mukaarr hoga...

...hathon ke pare aadha sifar dhundhta reh gaya

" saaye .. "

kayi raaton ki aankhon me dhool jhonki hai maine,
kai andhron ki giraft chhod ke bhaaga hun ...

is Seher ke Sheher me aaya tha
yahi sochkar ki yahan main aznabii hun ...

din chadte chadte
mere pairon tale saaye ban ne lage hain ..

shayad yahan bhi koi mujhe pehchaanta hai !

" Zindagii ke panne ! "

"Panno pe zindagii,
ya Zindagii ke panne ...

koi zild kar do in panno ko
jispe maine apne kisse likhe hain,
kuch afsaane, kuch dard ke hisse likhe hain ..
chahta hun ki duniya ki nazarein bhi pade ispe,
unke aansun, dard, khushiya sang jiye iske ..

par Zindagii ke panne,
khaalii khaalii se hain,
ispe koi aisee syahii hai, jo dikhti nahi hai ..
faad kar jalata rehta hun purane ho chuke
zard panno ko ..
par hamesha kuch naye paata hun,
khaali panne, na dikhne walii syahii ke saath ..

naye to lagte hain,
par 'zard' hain ye shayad ..
pata nahi kis kaarkhaane se bankar aate hain ye ..
pata nahi ..!! "